Hoxe conmemoramos o Día Internacional da Muller poñendo en valor a figura das nosas antecesoras que facilitaron que hoxe desfrutemos de unha serie de dereitos, sen esquecer a nosa responsabilidade de cara a avanzar en novas conquistas para as novas xeracións.
Convocamos a toda a veciñanza ó acto conmemorativo que terá lugar o venres, día 13 de marzo ás 12.00 horas no parque da Igualdade (Cachamuíña), se as condicións climatolóxicas nolo permiten, no que os nosos escolares relatarán e porán en valor o papel da muller na nosa sociedade.
“DEREITOS. XUSTIZA. ACCIÓN. PARA TODAS AS MULLERES E NENAS”.
Un ano máis, o Concello do Pereiro de Aguiar únese á conmemoración do 8 de marzo, Día Internacional da Muller, nesta ocasión baixo o chamamento global de ONU Mulleres: “Dereitos. Xustiza. Acción. Para TODAS as mulleres e nenas”. Como institución máis próxima á veciñanza, reafirmamos o noso compromiso inquebrantable de facer destes piares unha realidade cotiá no noso municipio.
DEREITOS: O camiño percorrido e o que queda por andar Recoñecemos os logros acadados grazas á loita histórica de todas as mulleres. Porén, no Pereiro de Aguiar non esquecemos que os dereitos non son conquistas estáticas; deben protexerse e ampliarse cada día. Reivindicamos o dereito de cada muller a decidir sobre a súa vida e o seu futuro, sen barreiras nin discriminacións.
XUSTIZA: Unha débeda coa igualdade A xustiza para as mulleres implica eliminar a fenda salarial, recoñecer o valor dos coidados e garantir unha vida libre de violencia machista. No noso concello, traballamos activamente a través do Centro de Información á Muller (CIM) para que ningunha muller se sinta soa e para construír entre todas un espazo de seguridade e apoio mutuo.
ACCIÓN: O momento é agora O lema deste ano urxe á acción. Non abondan as palabras; necesitamos seguir traballando no desenvolvemento dunhas políticas públicas que aporten solucións integrais. Así, O Pereiro de Aguiar comprométese a:
Impulsar a conciliación a través do Plan Corresponsables mediante a Aula Concilia.
- Fomentar a participación activa das mulleres no ámbito rural e económico do municipio.
- Educar en igualdade ás novas xeracións para que as nenas de hoxe sexan as mulleres libres de mañá.
PARA TODAS AS MULLERES E NENAS Este manifesto vai dirixido a todas: ás nosas maiores, custodias da nosa memoria; ás mulleres rurais que sosteñen o territorio; ás traballadoras, ás estudantes e a todas as nenas que soñan cun mundo máis xusto.
Neste 8M, O Pereiro de Aguiar ergue a voz para dicir que a igualdade non é unha opción, é unha necesidade de xustiza social. Pasemos á acción por todas e cada unha de nós.
Dereitos. Xustiza. Acción. Para TODAS as mulleres e nenas